بۇگىن ماجىلىستە ۆيتسە-سپيكەر ۆلاديمير بوجكونىڭ توراعالىق ەتۋىمەن «قورعانىس ونەركاسىبى كەشەنىن دامىتۋدىڭ وزەكتى ماسەلەلەرى» ۇكىمەت ساعاتى ءوتتى, دەپ ءحابارلايدى ماجىلىستىڭ ءباسپاسوز قىزمەتى.
ءىس-شارانى اشۋ بارىسىندا ءماجىلىس توراعاسىنىڭ ورىنباسارى ۆ. بوجكو مەملەكەت باسشىسى, جوعارعى باس قولباسشى نۇرسۇلتان ءابىش ۇلى نازارباەۆتىڭ ەلىمىزدىڭ قورعانىس-ونەركاسىپ كەشەنىن دامىتۋ جانە ونى قولداۋ ماسەلەلەرىنە ەرەكشە نازارىن ەسكەرە وتىرىپ, وتكىزىلىپ وتىرعان ءىس-شارانىڭ ماڭىزدىلىعىنا توقتالدى.
ءىس-شاراعا ءماجىلىس دەپۋتاتتارى, ۇلتتىق قاۋىپسىزدىك كوميتەتى, باس پروكۋراتۋرا, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى, قورعانىس جانە اەروعارىش ونەركاسىبى, سىرتقى ىستەر, قورعانىس, ىشكى ىستەر, ءبىلىم جانە عىلىم, ينۆەستيتسيالار جانە دامۋ مينيسترلىكتەرى, اكىمدىكتەر مەن قورعانىس ونەركاسىبى كەشەنى كاسىپورىندارىنىڭ وكىلدەرى قاتىستى.
قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ قازاقستان رەسپۋبليكاسىنىڭ قورعانىس ونەركاسىبى كەشەنىنىڭ قازىرگى كەزەڭدەگى جاي-كۇيى مەن دامۋ پەرسپەكتيۆالارى جانە وسىعان بايلانىستى مينيسترلىكتىڭ الدىنا قويعان مىندەتتەرى جايلى ەگجەي-تەگجەيلى ايتىپ ءوتتى.
قوسىمشا باياندامامەن ءسوز سويلەگەن بەيىندى كوميتەتتىڭ توراعاسى مۇحتار ەرمان قورعانىس ونەركاسىبى ساياساتىن قازىرگى كەزەڭدە جۇزەگە اسىرۋدىڭ بىرقاتار ماڭىزدى اسپەكتىلەرىن ايقىندادى.
دەپۋتات ولاردىڭ ىشىندە پارلامەنت ماجىلىسىمەن «قورعانىس ونەركاسىبى مەن مەملەكەتتىك قورعانىستىق تاپسىرىس تۋرالى» زاڭ جوباسى اياسىندا قارالىپ وتىرعان, قورعانىس ونەركاسىبى كەشەنىن دامىتۋ ءۇشىن ماڭىزدى بولىپ تابىلاتىن نەگىزگى اسپەكتىلەرگە ەرەكشە نازار اۋداردى.
سونىمەن قاتار, قورعانىس ونەركاسىبى كاسىپورىندارىن جاڭعىرتۋدا مەملەكەتتىك-جەكەمەنشىك ارىپتەستىك تەتىكتەرىن نەعۇرلىم بەلسەندى پايدالانۋ, بيۋدجەت قاراجاتىن ءتيىمدى پايدالانۋ, اسكەري-تەحنيكالىق ىنتىماقتاستىقتى جانداندىرۋ, قورعانىس ونەركاسىبى كەشەنى ءۇشىن كادرلاردى دايىنداۋ قاجەتتىلىگى جانە باسقا دا ماسەلەلەر ايتىلدى.
پىكىرسايىسقا قاتىسقان ءماجىلىس دەپۋتاتتارى بايانداماشى مەن شاقىرىلعان مەملەكەتتىك ورگانداردىڭ باسشىلارىنا بىرقاتار ماسەلەلەردى العا تارتتى. دەپۋتات قابيبوللا جاقىپوۆ مەملەكەتتىك قورعانىستىق تاپسىرىستىڭ قالىپتاسۋى جونىندە سۇراسا, دەپۋتات پاۆەل كازانتسەۆ ۆەدومستۆولار اراسىندا عىلىمي-زەرتتەۋ سالاسىنداعى ءوزارا ارەكەتتەستىك ماسەلەلەرىنە باسا نازار اۋداردى. دەپۋتات ناتاليا جۇمادىلداەۆا قورعانىس ونەركاسىبى كەشەنى ءۇشىن كادرلاردى دايىنداۋ جونىندە سۇراق قويدى. پارلامەنت مۇشەلەرى نۇرلان دۋلاتبەكوۆ پەن جانات جاراسوۆ ۇلتتىق ۇلان مەن شەكارالىق قىزمەت بولىمشەلەرىن وتاندىق اسكەري ونىممەن قامتاماسىز ەتۋ اسپەكتىلەرىنە قاتىستى ماسەلەلەردى كوتەردى.
قىزۋ تالقىلاۋدا ءسوز جارىستىرعان ءماجىلىس دەپۋتاتتارى اباي تاسبولاتوۆ جانە قۇدايبەرگەن ەرجان قورعانىس ونەركاسىبى كەشەنىن دامىتۋدىڭ بىرقاتار باسىم اسپەكتىلەرىنە نازار اۋداردى.
ۇكىمەت ساعاتى قورىتىندىسىنا وراي مەملەكەتتىك ورگاندار ءۇشىن قازاقستان رەسپۋبليكاسى قورعانىس ونەركاسىبى كەشەنىن دامىتۋ جونىندە اتقارىلىپ جاتقان جۇمىستىڭ تيىمدىلىگىن ارتتىرۋ بويىنشا قازاقستان رەسپۋبليكاسىنىڭ ۇكىمەتىنە جىبەرىلەتىن ۇسىنىمدار ازىرلەندى.